Cyhoeddi Data 2017-18
Ystadegau Dysgu Cymraeg
Mae data'r rhaglen Dysgu Cymraeg yn cael eu rheoli gan y Ganolfan Dysgu Cymraeg Genedlaethol.
Mae cronfa ddata ganolog yn casglu gwybodaeth gan bob dysgwr wrth iddynt gofrestru i fynychu cwrs. Mae’r wybodaeth hon yn cynnwys manylion am y dysgwr (e.e. enw, cyfeiriad, dyddiad geni) a’r cwrs (lefel, lleoliad, dwyster y dysgu).
Mae’r data sy'n cael eu casglu gan y Ganolfan yn wahanol i’r data a gasglwyd ar gyfer y sector yn y gorffennol. Mae’r dull o gasglu’r data hefyd yn wahanol.
Cyhoeddi Data 2017-2018
Yn dilyn rhoi Cynllun Rheoli Data y Ganolfan ar waith, y flwyddyn lawn gyntaf o ddata sydd gan y Ganolfan i’w rhannu yw data ar gyfer y flwyddyn academaidd 2017-2018 (1 Awst 2017–31 Gorffennaf 2018).
Dyma grynodeb - cyhoeddir yr ystadegau yn llawn ar wefan Llywodraeth Cymru.
Niferoedd y dysgwyr unigryw
Mae 'niferoedd y dysgwyr unigryw' yn cyfrif pob dysgwr unwaith yn unig, faint bynnag o gyrsiau maent wedi eu dilyn yn ystod y flwyddyn. Yn 2017-2018 roedd cyfanswm o 12,680 o ddysgwyr unigryw.
Dyma'r gwaelodlin cenedlaethol ar gyfer y sector. O fan cychwyn y trefniadau newydd hyn, bydd modd gwneud cymariaethau blwyddyn ar flwyddyn.
Gweithgareddau dysgu
Gall dysgwyr fynychu mwy nag un gweithgaredd dysgu ar lefel neu ddwyster gwahanol yn ystod y flwyddyn. Er enghraifft, gall dysgwr unigol fynychu cwrs 170-259 awr ar lefel Mynediad yn ogystal â chwrs 'fesul awr' ar lefel Sylfaen yn ystod y cyfnod. Cyfrifir hyn fel dau weithgaredd dysgu.
Yn 2017-2018 cymerodd y dysgwyr ran mewn o 19,490 o weithgareddau dysgu.
Lefel y dysgu
Mae cyfleoedd dysgu o fewn y rhaglen Dysgu Cymraeg yn cael eu cynnig ar bump lefel.
Yn 2017-2018 roedd 51% ar lefel Mynediad. Mynediad yw'r lefel gychwynnol i ddechreuwyr. Roedd 18% ar lefel Sylfaen a 31% ar lefelau Canolradd neu Uwch (gan gynnwys Hyfedredd).
Dwyster y dysgu
Mae cyfleoedd dysgu o fewn y rhaglen dysgu Cymraeg yn cael eu cynnig ar bump lefel o ddwyster. Mae 'dwyster' yn cael ei ddiffinio yn ôl yr oriau cyswllt dan arweiniad tiwtor. Mae hyn yn rhoi hyblygrwydd i’r dysgwyr ddewis y cwrs mwyaf addas.
Yn 2017-2018 darparodd 42% o'r cyfleoedd hyn ddysgu ar gyrsiau 50-79 awr.
Un o amcanion strategol y Ganolfan yw cynnig mwy o gyfleoedd dysgu dwys, sy’n galluogi dysgwyr i ddysgu’r iaith yn gynt. Yn 2017-2018 darparodd 12% o'r cyfleoedd hyn ddysgu dros 110 awr.
- - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - -
Data'r dyfodol
O hyn ymlaen bydd y Ganolfan yn cyhoeddi data blynyddol ar gyfer y sector Dysgu Cymraeg. Bydd modd gwneud cymariaethau blwyddyn ar flwyddyn yn seiliedig ar y gwaelodlin newydd a gyhoeddir uchod.