Holi Katarina

Mae Katarina Roberts yn dod o Slofacia, ond mae bellach yn byw yn Rhydypennau ger Aberystwyth.   

Mae’n dysgu Cymraeg gyda Dysgu Cymraeg Ceredigion, Powys a Sir Gâr, sy’n darparu cyrsiau ar ran y Ganolfan Dysgu Cymraeg Genedlaethol.  

Mi wnaeth Katarina ennill gwobr ‘Dysgwr Prosiect Cymraeg yn y Cartref’ yn yr Eisteddfod Genedlaethol eleni. 

Yma, ’dyn ni’n holi Katarina am ei thaith i ddysgu Cymraeg… 

Ble dych chi’n dysgu Cymraeg?  

Dw i’n dysgu Cymraeg yn Aberystwyth.  Dw i’n mynd i ddosbarth wyneb yn wyneb dair gwaith yr wythnos.  Eleni, mi wnes i basio’r arholiad lefel Mynediad.  

Pam penderfynu dysgu Cymraeg?  

Mi wnes i ddweud wrth fy ngŵr fy mod am ddysgu Cymraeg, ar ôl symud i Gymru.  

Pa mor bwysig ydy gallu defnyddio’r iaith gartref gyda’r plant? 

Dw i eisiau dangos i fy mhlant bod dysgu pethau newydd yn gallu bod yn werth chweil, a dw i eisiau eu helpu gyda’u gwaith cartref.  Dw i’n ymarfer siarad Cymraeg gyda’r plant, pan dw i’n siopa neu gyda ffrindiau yn ystod gemau rygbi’r plant.  

Sut deimlad oedd derbyn y wobr yn yr Eisteddfod Genedlaethol?  

Roedd fel breuddwyd, a dw i mor falch o fod wedi derbyn y wobr. 

Beth ydy eich nod gyda’r Gymraeg yn y dyfodol?  

Dw i eisiau parhau i ddysgu Cymraeg a phasio’r arholiad nesaf.  Mae siarad Cymraeg o fantais wrth geisio am swyddi yn yr ardal hon.  Dw i eisiau astudio i fod yn fydwraig, a defnyddio’r Gymraeg wrth weithio yn y gymuned leol. 

Unrhyw gyngor i eraill sy’n ystyried dechrau dysgu Cymraeg?  

Dych chi’n gallu llwyddo, felly ewch amdani.  Cofiwch ofyn am gymorth gan eraill – mae fy nheulu a Rhiannon Taylor, fy nhiwtor, wedi bod yn gefnogol iawn.