Holi Sarah 

Holi Sarah Mae Sarah Merton yn dod o Gasnewydd.  Dechreuodd ddysgu Cymraeg naw mlynedd yn ôl gyda Dysgu Cymraeg Gwent, sy’n darparu cyrsiau ar ran y Ganolfan Dysgu Cymraeg Genedlaethol.   

Yn ogystal â gweithio yn Llyfrgell Abertyleri, mae Sarah yn diwtor Dysgu Cymraeg erbyn hyn ac yn mwynhau trefnu gweithgareddau i ddysgwyr yn yr ardal leol.   

Yma, ’dyn ni’n holi Sarah am ei thaith i ddysgu Cymraeg… 

Pam penderfynu dechrau dysgu Cymraeg? 

Dw i wrth fy modd yn gwylio pêl-droed.  Haf 2016 oedd yr haf gorau erioed - es i i Ffrainc i gefnogi Cymru yn yr Ewros.  Yn ystod y daith, roedd pobl yn siarad Cymraeg yn y dorf.  Mi wnes i sylweddoli pa mor bwysig ydy'r iaith i Gymru, felly roedd rhaid i fi ddechrau dysgu. 

Soniwch ychydig am eich gwaith gyda’r llyfrgell. 

Pan ddechreuais i weithio yn Llyfrgell Abertyleri, doedd dim llawer o bobl yn siarad Cymraeg yn yr ardal.  Felly, mi wnes i ddechrau Clwb Cymraeg wythnosol i bobl ymarfer sgwrsio.  Mae’r grŵp wedi tyfu llawer.  Y llynedd, cefais wobr 'Pencampwr y Gymraeg' gan Gyngor Blaenau Gwent.  

Ble dych chi’n dysgu Cymraeg? 

Dw i’n dysgu dosbarth lefel Mynediad ar-lein gyda Dysgu Cymraeg Ardal Bae Abertawe, ac wrth fy modd.  Mi wnes i drefnu mynd â’r dosbarth i’r Eisteddfod Genedlaethol ym Mhontypridd er mwyn dangos i’r dysgwyr bod y Gymraeg yn iaith fyw. 

Dych chi’n trefnu teithiau cerdded i ddysgwyr? 

Ydw, dw i'n mwynhau cerdded.  Mae bod yn yr awyr agored yn llesol, ac mae enwau gwych ar blanhigion yn Gymraeg, er enghraifft 'llygad y dydd’.  

Unrhyw gyngor i eraill sy’n ystyried dechrau dysgu Cymraeg?   

Mae dysgu Cymraeg fel bwyta cacen enfawr – allwch chi ddim ei bwyta ar unwaith!  Rhaid cymryd un darn ar y tro, a dal ati.