Holi Ewa

Mae Ewa Wawrzyszuk yn dysgu Cymraeg ar gynlluniau’r gweithleoedd y Ganolfan Dysgu Cymraeg Genedlaethol, ac erbyn hyn mae hi’n defnyddio’r iaith yn rheolaidd yn ei gwaith o ddydd i ddydd.

Mae Ewa yn gweithio i gwmni adeiladu yn Llanelli, ac fe symudodd yno o wlad Pwyl yn 2007.

Yma, ’dyn ni’n holi Ewa am ei thaith i ddysgu Cymraeg…

Pam penderfynu symud i Gymru?

Symudais i Gymru gyda fy nghariad er mwyn dod o hyd i waith.  ’Dyn ni wedi priodi nawr, ac nid oedd gennym unrhyw gysylltiadau â Chymru cyn symud.

Ydych chi’n siarad unrhyw ieithoedd eraill?

Dw i’n siarad Pwyleg a Saesneg, a Chymraeg wrth gwrs.

Beth yw eich swydd?

Dw i’n gweithio fel Cynorthwyydd Cyfrifon i gwmni adeiladu.

Pam wnaethoch chi ddechrau dysgu Cymraeg?

Gan fy mod i’n byw yng Nghymru, ro’n i eisiau dysgu’r iaith dw i’n ei chlywed yn cael ei siarad yn lleol. 

Pa wahaniaeth mae dysgu Cymraeg wedi’i wneud i chi?

Dw i’n teimlo’n fwy hyderus pan dw i allan, achos dw i’n gallu cyfrannu at sgyrsiau.

Sut dych chi’n ymarfer siarad Cymraeg y tu allan i’r dosbarth?

Dw i’n trio siarad cymaint o Gymraeg â phosib gyda chydweithwyr yn y swyddfa.

Dych chi’n defnyddio llawer o Gymraeg yn y gwaith?

Dw i’n cyfarch cwsmeriaid sy’n siarad Cymraeg dros y ffôn neu dros e-bost.

Unrhyw gyngor i ddysgwyr eraill sy eisiau dechrau dysgu Cymraeg?

Peidiwch ag aros — ewch amdani!

Beth nesaf gyda’r Gymraeg?

Parhau i ddysgu, a symud ymlaen i’r lefel nesaf gobeithio.