Cyflwynir y tlws hwn i wirfoddolwr/aig am gyfraniad nodedig i’r sector Dysgu Cymraeg.
Gall hyn gynnwys trefnu gweithgareddau yn y gymuned, cynorthwyo dysgwyr yn unigol ar gynllun megis Cynllun Siarad, a dysgu’n wirfoddol, ond nid yw’n gyfyngedig i’r gweithgareddau hyn.
Cyflwynir y tlws i’r buddugol mewn digwyddiad arbennig yng Nghaerdydd brynhawn Mawrth, 14 Mai.
Cafodd Aled Roberts ei eni a'i fagu yn Rhosllanerchrugog ger Wrecsam, ac mi aeth i Ysgol y Ponciau, Ysgol y Grango ac Ysgol Rhiwabon.
Aeth yn ei flaen i astudio'r Gyfraith ym Mhrifysgol Aberystwyth cyn gweithio fel cyfreithiwr yn ardaloedd Wrecsam, Rhuthun a’r Wyddgrug.
Roedd yn gyn-Aelod Cynulliad dros y Democratiaid Rhyddfrydol, a bu’n Arweinydd Cyngor Bwrdeistref Sirol Wrecsam hefyd.
Aled Roberts oedd Comisiynydd y Gymraeg rhwng 2019 a 2022.
Gwahoddir enwebiadau ar gyfer y Tlws hwn erbyn 26 Ebrill. Bydd yr enwebiadau’n cael eu sgorio yn erbyn y meini prawf isod.
Bydd panel o dri yn dewis yr enillydd: aelod o staff y Ganolfan Dysgu Cymraeg, aelod o Fwrdd Ymgynghorol y Ganolfan Dysgu Cymraeg, cynrychiolydd o blith partneriaid y Ganolfan.
Ni ddylai enwebiadau fod yn fwy na 400 o eiriau.