Ciao! Colleen ag Owain

Mae cyfres newydd wedi dechrau ar S4C o’r enw Ciao! Colleen ag Owain.   

Colleen Ramsey ac Owain Wyn Evans sy’n cyflwyno’r gyfres – maen nhw’n mynd ar daith o amgylch yr Eidal. 

Mae Owain yn hoffi ffasiwn ac adeiladau’r Eidal, tra mae Colleen yn hoffi’r wlad a’r bwyd, ar ôl byw yno am ddwy flynedd a hanner, pan oedd ei gŵr, Aaron Ramsey yn chwarae pêl-droed i Juventus. 

Yma, ’dyn ni’n holi Colleen am y rhaglen a llawer mwy… 

Sut brofiad oedd gwneud y gyfres? 

Ro’n i ychydig yn ofnus i ddechrau, ond ro’n i mewn dwylo da gyda Owain.  Cawson ni lawer o hwyl a dod i adnabod ein gilydd yn dda.   

Oes gen ti hoff le yn yr Eidal? 

Fy hoff le yn yr Eidal yw Sardinia, ond dw i hefyd yn hoffi Lucca, a Turin oherwydd ro’n i’n byw yno gyda’r teulu. 

Beth oeddet ti’n ei hoffi am fyw yn yr Eidal? 

Yn amlwg, dw i'n caru'r bwyd, ond roedd y bobl yn garedig ac mae'r tywydd yn hyfryd.  

Beth ti’n hoffi fwyaf, pitsa neu basta? 

⁠Pitsa!  Does dim gwell na phitsa Eidalaidd ffres a chynnes. 

Sut brofiad oedd dysgu Eidaleg? 

Mae dysgu'r gramadeg yn hawdd – ond mae angen hyder i'w siarad o ddydd i ddydd gyda phobl eraill.  

Wyt ti’n hoffi dysgu ieithoedd? 

⁠Ydw, dw i eisiau dysgu mwy o ieithoedd.  

Unrhyw gyngor i bobl sy eisiau dysgu iaith newydd? 

Peidiwch â phoeni am wneud camgymeriadau.  Mae angen i chi ymarfer trwy siarad cymaint â phosibl. 

Pwy sy’n coginio yn eich tŷ chi? 

Fi a fi yn unig! 

Pa brosiectau sy ar y gweill yn 2026? 

⁠Llawer o goginio!  Hoffwn i wneud mwy o bodlediadau a gwaith teledu.