Cylchgrawn Cara
Yma, ’dyn ni’n holi Meinir ac Efa, mam a merch sydd y tu ôl i gylchgrawn Cara.
Cafodd y cylchgrawn ei sefydlu yn 2019, er mwyn rhoi llwyfan a llais i waith menywod Cymru.
Maen nhw wedi cyhoeddi llyfrau hefyd, a bydd eu cyfrol ddiweddaraf, Man Draw, yn cael ei thrafod mewn digwyddiad arbennig yn ystod Gŵyl Amdani y Ganolfan Dysgu Cymraeg Genedlaethol ar 5 Mawrth.
Dewch i ddysgu mwy am gynnwys Cara, a’r broses o greu’r cylchgrawn…
O ble ddaeth y syniad i greu cylchgrawn Cara?
Ro’n i eisiau creu cylchgrawn i fenywod, gan fenywod, yn trafod pynciau sy’n addas iddyn nhw. Roedd bwlch yn y farchnad ar gyfer cylchgrawn Cymraeg o’r fath, felly penderfynon ni fynd amdani!
Beth yw’r hanes y tu ôl i’r teitl?
Ro’n i’n chwilio am enw byr, hawdd i’w ddweud. Enw merch ydy Cara, ac mae hefyd yn golygu cariad. Yn Sbaeneg, mae’n golygu wyneb, sy’n addas gan fod wyneb merch ar y clawr fel arfer.
Sut brofiad yw cydweithio ar y cylchgrawn?
Mae’n brofiad arbennig iawn. Meinir sy’n gofalu am y gwaith o ddydd i ddydd, ond ’dyn ni’n dwy yn golygu ac yn prawf ddarllen y cylchgrawn, cyn mynd i brint. ’Dyn ni hefyd yn ysgrifennu rhai o’r erthyglau a’r golofn olygyddol.
Sut mae rhifyn yn cael ei gynhyrchu?
Mae tua 25 o erthyglau ym mhob rhifyn, a ’dyn ni’n cyhoeddi tri chylchgrawn y flwyddyn. Diolch i gyfranwyr rheolaidd, mae’r broses yn un brysur ond pleserus – darllen, golygu, dod o hyd i luniau, a phrawf ddarllen sawl gwaith cyn argraffu.
Sut dych chi’n dewis y themâu a’r cynnwys ar gyfer pob rhifyn?
Mae rhai erthyglau rheolaidd yn y cylchgrawn, fel Cymraes Dramor, Merched Crefftus, Merched mewn Hanes, Steilio Cartref a Materion Cyfoes. Yn ogystal â hynny, mae rhai am deithio, ffasiwn, bwyd a diod, iechyd a lles yn rhan ganolog o Cara. ’Dyn ni hefyd yn cynnwys erthyglau sy’n cyd-fynd â’r tymhorau.
Pa erthygl neu rifyn o Cara sydd fwyaf arbennig i chi, a pham?
Pob un! Mae’n deimlad cyffrous pan mae’r erthyglau’n cyrraedd dros e-bost, ac wrth dderbyn y copïau o’r wasg. ’Dyn ni hefyd wedi cyhoeddi tair cyfrol, Adref (2020), Cara dy hun drwy’r Newid mawr (2023) a Man Draw (2025).
Oes cynnwys i ddysgwyr?
Oes, mae Cymraes Newydd yn rhoi sylw i fenywod sy’n dysgu Cymraeg. Nid oes gormod o destun ar bob tudalen, ac mae geirfa Saesneg yn cael ei chynnwys pan fo angen. Os oes stori gyda chi am eich taith yn dysgu’r iaith, cysylltwch - cylchgrawncara@gmail.com
Pa gyngor fyddech chi’n ei roi i ddysgwyr sy’n awyddus i ddarllen mwy yn Gymraeg?
Ewch amdani! Mae Cara yn berffaith i ddysgwyr - dych chi’n gallu darllen un erthygl neu ddwy ar y tro, gyda geiriadur wrth law, os oes angen.
Beth nesaf i Cara?
Eleni ’dyn ni’n cynnal sesiwn yng Ngŵyl Lên Llandeilo, a byddwn ni’n trefnu Ffair Fai Cara yn Aberystwyth, ddydd Sadwrn 2 Mai. Efallai y bydd stondin gan Cara yn yr Eisteddfod Genedlaethol, yn ogystal ag ambell ffair Nadolig.