Holi John

Mae John Smith yn dysgu Cymraeg gyda Dysgu Cymraeg Ardal Bae Abertawe, sy’n cael ei drefnu gan Brifysgol Abertawe ar ran y Ganolfan Dysgu Cymraeg Genedlaethol.  Dechreuodd John ddysgu Cymraeg ar ôl symud i Gymru yn 2021.

Beth yw dy gefndir?

Dw i’n dod o’r Alban yn wreiddiol, ond ces i fy magu yn Lloegr.  Ro’n i’n byw yn Essex cyn symud i Gymru.

Ers pryd wyt ti’n dysgu Cymraeg?

Dechreuais i ddysgu Cymraeg gyda SaySomethinginWelsh ar ôl symud i Gymru.  Gwnes i ymuno â chwrs wyneb-yn-wyneb ym mis Medi 2022.  Dw i wedi pasio lefel Mynediad a Sylfaen.  Nawr, dw i’n gwneud cwrs Canolradd.

Pam ddechreuaist ti ddysgu Cymraeg?

Mae fy merch yn byw yng Nghymru ers 10 mlynedd.  Ro’n i’n dwlu ar fywyd yng Nghymru a gwnes i ddechrau dangos diddordeb yn yr iaith a’r diwylliant Cymreig.  Hefyd, ro’n i eisiau cwrdd â phobl newydd, a bod yn rhan o’r gymuned leol.

Beth wyt ti wedi mwynhau fwyaf am ddysgu Cymraeg?

Dw i wrth fy modd yn dysgu Cymraeg.  Fy hoff beth yw darllen straeon Cymraeg.  Dw i’n mwynhau ffeindio awduron newydd, a nawr dw i’n trio darllen cerddi Cymreig.  Ond, yn bennaf oll, dw i’n mwynhau dysgu gyda ffrindiau newydd.

Pa gyngor sy gyda ti ar gyfer dysgwyr eraill?

Mwynhewch y cwrs a thrio cymryd rhan mewn digwyddiadau eraill sy ar gael. Manteisiwch ar bob cyfle i siarad Cymraeg yn y gymuned.

Ar wahân i ddosbarthiadau, sut wyt ti’n ymarfer siarad Cymraeg?

Dw i’n darllen y newyddion ar ap BBC Cymru Fyw bob dydd.  Hefyd, dw i’n darllen llyfrau cyfres Amdani.  Dw i’n defnyddio iPlayer ac S4C Clic i edrych ar raglenni Cymraeg.  Dw i’n mynd i’r dafarn i siarad neu ganu gyda fy ffrindiau.

Sut mae dy fywyd di wedi newid ers dysgu Cymraeg?

Dw i wedi cwrdd â phobl newydd a gwneud llawer o ffrindiau.  Dw i wedi darganfod llefydd diddorol, a dysgu am hanes Cymru.  

Beth yw’r cam nesaf ar dy daith iaith?

Dw i eisiau gorffen y cwrs Canolradd, ac efallai sefyll yr arholiad.  Wedyn, bydda i’n dechrau’r cwrs Uwch.