Holi Kathy

Yma, ’dyn ni’n holi Kathy Jones, Swyddog Cefnogi Dysgwyr Dysgu Cymraeg Morgannwg, sy’n cael ei drefnu gan Brifysgol De Cymru ar ran y Ganolfan Dysgu Cymraeg Genedlaethol. 

Mae Kathy yn diwtor Dysgu Cymraeg ac yn trefnu digwyddiadau i ddysgwyr yn yr ardal.  Mae Kathy wrth ei bodd yn ei gwaith, ac yn sôn mwy am ei swydd…

O ble dych chi’n dod, a ble dych chi’n byw nawr?

Dw i’n dod o Ferthyr ac yn dal i fyw yno.  Ro’n i’n byw ar waelod y cwm, ond nawr yn byw ar ben y cwm.

Eich hoff beth am fod yn diwtor?

Dw i wrth fy modd yn gweld hyder y dysgwyr yn codi, o’r dosbarth cyntaf a thrwy’r lefelau.

Beth dych chi’n wneud o ddydd i ddydd?

Dw i’n diwtor Cymraeg, ond hefyd yn gyfrifol am greu cyfleoedd i ddysgwyr ymarfer eu Cymraeg.  Dw i’n cadw mewn cysylltiad â phartneriaid, busnesau, elusennau, grwpiau ac unigolion sy’n cynnig cyfleoedd i ddysgwyr ddefnyddio eu Cymraeg yn y gymuned.

Gyda phwy dych chi’n gweithio yn lleol?

Y Fenter Iaith, Cynghorau Sir, Prifysgol De Cymru, ysgolion, amgueddfeydd, tafarndai, caffis a chestyll.  Wrth weithio mewn partneriaeth, ’dyn ni’n ffeindio cyfleoedd i ddysgwyr ymarfer yr iaith tu fas i’r dosbarth.  Pethau fel boreau coffi, mynd am dro, noson gwis, ymweld â lleoliadau ac ati.

Oes digwyddiad yn aros yn y cof?

Eisteddfod Rhondda Cynon Taf 2025.  Digwyddiad prysur dros ben, ond ro’n i wrth fy modd yn siarad â dysgwyr lleol a thu hwnt. 

Pa wahaniaeth mae cymryd rhan mewn digwyddiadau y tu allan i’r dosbarth yn ei wneud i ddysgwyr?

Dyma ble mae’r dysgwyr yn cael gafael ar yr iaith, y cyfle i siarad yn rhydd ac yn naturiol, heb strwythur.  Dyma’r cyfle i wneud camgymeriadau, ond cael hwyl mewn awyrgylch cyfeillgar a chefnogol.

Unrhyw gyngor i diwtoriaid newydd?

Ymlaciwch a mwynhewch.  Gofynnwch am gyngor, mae eich mentor yno i’ch helpu bob amser.

Beth yw eich cyngor i bobl sy wrthi’n dysgu Cymraeg?

Does neb yn berffaith, felly ewch amdani!