Holi Sue Hyland

Cafodd Sue Hyland ei geni a’i magu yn Lloegr, ond mae’n byw yn ymyl Llanidloes ers 2012.  Mae wedi dysgu Cymraeg, a bellach yn dysgu ar lefel Gloywi gyda Dysgu Cymraeg Ceredigion, Powys a Sir Gâr.  Mae Sue yn mwynhau ysgrifennu, ac enillodd Gadair y Dysgwyr yn Eisteddfod Genedlaethol Pontypridd 2024.

Pam dysgu Cymraeg?

Mi wnes i ddechrau dysgu Cymraeg ar ôl symud i Gymru.  Ro’n i eisiau gwybod sut i ddweud arwyddion ffyrdd, ac enwau pentrefi.  Ar ôl y wers gyntaf, ro'n i wrth fy modd!  Os dach chi’n byw yng Nghymru, rhaid i chi drio dysgu’r iaith.  Mae’r iaith Gymraeg yn werthfawr, a rhaid i ni gyd wneud ein gorau glas i gadw’r iaith yn fyw. 

Beth yw’r peth gorau am ddysgu Cymraeg?

Dw i wedi cwrdd â chymaint o bobl wych, a gwneud llawer o ffrindiau newydd.  Dw i hefyd wedi bod i Nant Gwrtheyrn 11 gwaith i ddysgu am ddiwylliant a hanes Cymru.  

O ble ddaeth y diddordeb mewn barddoni?

Yn ystod y cyfnod clo, mi wnes i weithdy ysgrifennu creadigol efo Mared Lewis.  Mi wnes i ysgrifennu stori fer, ac yn 2022, cafodd y stori ei chyhoeddi yn Y Daith, sef llyfr o gyfres Amdani, sy’n cynnwys straeon gan ddysgwyr.

Sut deimlad oedd ennill y Gadair?

Ro'n i mor hapus!  Mae'r Gadair yn eistedd ar y cwpwrdd yn yr ystafell fyw, ble dw i'n gallu ei gweld hi bob dydd.

Dych chi wedi ennill cystadlaethau llenyddol o’r blaen?

Dw i wedi ennill llawer o bethau dros y blynyddoedd, gan gynnwys gwobrau mewn Eisteddfodau lleol a chenedlaethol, yn ogystal â chystadlaethau Merched y Wawr.

Soniwch ychydig am gynnwys y gerdd fuddugol?

Mi ges i'r ysbrydoliaeth i ysgrifennu’r gerdd ar ôl byw mewn lle mor hardd.  Roedd y gerdd am hen ddynes yn yr ysbyty, sy’n hiraethu am ei chartref.

Dych chi eisiau ysgrifennu mwy?  

Cymraeg yw fy ail iaith, felly mae’n cymryd llawer o amser i mi ysgrifennu yn Gymraeg.  Dw i wedi dechrau dysgu sut i chwarae’r delyn, ac yn mwynhau yn fawr.  Mi wna i ysgrifennu yn y dyfodol, ond dw i eisiau canolbwyntio ar fy nhelyn hefyd. 

Beth dych chi’n ei wneud i hybu’r Gymraeg yn eich ardal leol?

Yn 2023, mi wnes i ddechrau clwb sgwrsio yn Llanidloes.  Mae Clwb y Dderwen yn mynd o nerth i nerth, ac yn cael ei gynnal bob dydd Llun.  Dan ni'n siarad am bopeth dan haul, ac mae’n addas i ddysgwyr ar bob lefel.