“Mae gallu siarad Cymraeg yn teimlo fel superpower”

Yn wreiddiol o Aberhonddu, mae Kierion Lloyd bellach yn byw yn ardal Wrecsam. Mae wrth ei fodd gyda’r Gymraeg – dyma ei hanes...

Pam roeddet ti eisiau dysgu Cymraeg?

Roedd fy nhad yn y fyddin felly ro’n ni fel teulu yn symud o gwmpas llawer. Ches i ddim llawer o gyfleoedd i ymarfer na siarad Cymraeg pan o’n i’n blentyn.

Dechreuais i ddysgu chwe blynedd yn ôl gyda Dysgu Cymraeg Gogledd Ddwyrain, sy’n cael ei redeg gan Goleg Cambria ar ran y Ganolfan Dysgu Cymraeg Genedlaethol. Dw i’n dilyn cwrs Uwch ar hyn o bryd a dw i wrth fy modd yn dysgu Cymraeg. Ro’n i eisiau dysgu oherwydd fy mod i’n teimlo fel Cymro. Ro’n i eisiau bod yn rhan o’r diwylliant a chysylltu gyda fy ngwreiddiau. Mae gallu siarad Cymraeg yn teimlo fel superpower.

Pryd a ble wyt ti’n defnyddio dy Gymraeg?

Dw i’n dwlu ar gerddoriaeth a dw i’n teithio llawer er mwyn mynd i wyliau cerddorol. Dw i’n mynd i Tafwyl a Sesiwn Fawr Dolgellau bob blwyddyn, sef gwyliau Cymraeg yng Nghaerdydd a Dolgellau, a gwyliau fel Gŵyl Go Go Goch, digwyddiad yn Llanfairpwllgwyngyll, a’r Eisteddfod Genedlaethol, sef dathliad o’r celfyddydau, iaith a diwylliant yng Nghymru. Dw i’n trio fy ngorau glas i gymysgu gyda phobl trwy gyfrwng y Gymraeg. Dw i’n hoffi clywed acenion gwahanol pobl ar draws Cymru. Dw i eisiau byw fy mywyd yn Gymraeg.

Be ydy’r peth gorau am ddysgu Cymraeg?

Cymuned ydy’r peth gorau am ddysgu Cymraeg. Pan dw i’n mynd i gigs, mae pawb mor gyfeillgar a chefnogol o bawb sy’n dysgu Cymraeg.

Be ydy dy ddiddordebau?

Cerddoriaeth yn bendant. Dw i hefyd yn hoffi mynd i gerdded yn y mynyddoedd a gwersylla gwyllt. Dw i’n hoffi bod yn yr awyr agored a chrwydro Cymru.

Dwed ychydig am y fordaith fuest ti arni yn ddiweddar. Sut aeth hi?

Roedd y daith yn wych. Roedden ni’n teithio o Ogledd Cymru i Amsterdam ar fferi, ac roedd yr holl adloniant trwy gyfrwng y Gymraeg. Roedd Dafydd Iwan, Bwncath, Fleur De Lys, a mwy yn chwarae. Dw i’n defnyddio cerddoriaeth i fy helpu i ddysgu Cymraeg felly pan glywais am y daith hon, ro’n i’n sicr fy mod i am fynd arni. Yn ogystal â mwynhau’r gerddoriaeth, cawson ni gyfle i grwydro Amsterdam. Roedd y daith yn brofiad ac yn gyfle da i gwrdd â phobl newydd.

Be ydy dy hoff air Cymraeg?

Dw i’n dysgu geiriau newydd bob dydd ond fy hoff air ar hyn o bryd ydy pendramwnwgl.

Be ydy dy gyngor i bobl sy’n dysgu Cymraeg?

Defnyddia’r Gymraeg sy gen ti. Paid rhoi gormod o bwysau ar dy hun i ddod yn rhugl. Mae’n bwysicach codi dy hyder i ddefnyddio a siarad Cymraeg.