Mae'r Ganolfan Dysgu Cymraeg Genedlaethol yn ehangu ei darpariaeth ar gyfer y Gweithlu Gofal Plant gyda chynllun peilot newydd i gryfhau sgiliau Cymraeg y gweithlu ac ateb y galw cynyddol am wasanaethau dwyieithog.
Gyda Gofal Plant yn un o brif flaenoriaethau’r Llywodraeth newydd, bydd y cynllun yn adeiladu ar waith blaenorol y Ganolfan â’r sector. Bydd yn cefnogi Deddf y Gymraeg ac Addysg (Cymru) drwy gryfhau’r sylfeini ar gyfer creu siaradwyr Cymraeg y dyfodol.
Ers 2017, mae'r Ganolfan wedi darparu hyfforddiant Cymraeg i’r gweithlu Gofal Plant, ac mae dros 5,000 o weithwyr wedi manteisio ar y ddarpariaeth hyd yma.
Gyda miloedd mwy yn gweithio yn y sector yng Nghymru, bydd cynllun peilot newydd y Ganolfan yn canolbwyntio ar gynyddu capasiti’r gweithlu i allu darparu cefnogaeth Gofal Plant yn y Gymraeg. Bydd y cynllun yn cynnwys:
Cynnal rhaglen Dysgu Cymraeg i’r gweithlu sy’n cefnogi myfyrwyr mewn colegau addysg bellach neu drwy brentisiaethau;
Penodi tiwtoriaid Dysgu Cymraeg i weithio’n uniongyrchol â darpariaethau Gofal Plant, boed yn feithrinfeydd neu’n warchodwyr unigol;
Penodi tiwtoriaid Dysgu Cymraeg i weithio â gweithwyr Chwarae mewn darpariaethau Gofal Plant y tu allan i’r ysgol, mewn ardaloedd penodol;
Darparu hyfforddiant Cymraeg i weithwyr ‘Dechrau'n Deg’, sy’n cefnogi plant ifanc a’u teuluoedd mewn ardaloedd penodol.
Dywedodd Dirprwy Brif Weinidog Cymru, sy'n gyfrifol am ofal plant, Sioned Williams:
Rydyn ni’n cyflwyno cynnig gofal plant trawsnewidiol a fydd y mwyaf hael yn y DU, gan roi’r dechrau gorau mewn bywyd i bob plentyn. Mae buddsoddi mewn gofal plant yn un o’r camau mwyaf pwerus y gallwn eu cymryd i gryfhau ein heconomi, gwella safonau byw a sicrhau dyfodol mwy llewyrchus i blant. Rydyn ni’n gweithio gyda darparwyr a phartneriaid i ehangu gofal plant cyfrwng Cymraeg fel rhan greiddiol o’n cynnig cyffredinol, a fydd yn galluogi mwy o blant i gael mynediad at ofal plant cyfrwng Cymraeg o oedran ifanc a chryfhau’r llwybr i addysg cyfrwng Cymraeg ledled Cymru. Mae cyrraedd o leiaf filiwn o siaradwyr Cymraeg erbyn 2050, a sicrhau bod pob plentyn yn cael y cyfle i ddod yn siaradwr Cymraeg hyderus, yn ganolog i weledigaeth y Llywodraeth hon. Bydd y cynllun peilot newydd gan y Ganolfan Dysgu Cymraeg Genedlaethol yn helpu i ddatblygu sgiliau Cymraeg y gweithlu gofal plant, gan gefnogi’r gwaith o feithrin siaradwyr Cymraeg y dyfodol o ddechrau eu bywydau.
Ychwanegodd Jane O'Toole, Prif Weithredwr Clybiau Plant Cymru Kids' Clubs:
Dyn ni’n croesawu'r peilot yma, fydd yn cryfhau sgiliau Cymraeg y gweithlu Chwarae ac yn helpu mwy o blant a theuluoedd i ddefnyddio'r Gymraeg yn naturiol trwy chwarae. Mae lleoliadau gofal plant y tu allan i oriau ysgol mewn sefyllfa arbennig o dda i wneud y Gymraeg yn rhan naturiol o fywyd pob dydd plant. Trwy fuddsoddi mewn gweithwyr Chwarae ac ymarferwyr gofal plant, bydd y bartneriaeth hon yn cryfhau hyder ac yn adeiladu capasiti y sector, gan gefnogi Cymru lle mae'r Gymraeg yn perthyn i bawb.
Dywedodd Dona Lewis, Prif Weithredwr y Ganolfan Dysgu Cymraeg Genedlaethol:
Mae'r blynyddoedd cynnar yn gyfnod hollbwysig pan fydd plant ifanc yn cychwyn ar eu taith iaith, ac mae gweithwyr y sector yn chwarae rhan allweddol wrth feithrin a chefnogi sgiliau dwyieithog y dyfodol. Bydd y cynllun peilot newydd yn gwneud defnydd o arbenigedd dysgu a chaffael iaith y Ganolfan, ynghyd â’i phartneriaid, i gynyddu capasiti yn y sector er mwyn sicrhau bod mwy o blant a theuluoedd yn cael cyfle i ddefnyddio’r Gymraeg yn eu bywydau pob dydd.
