Cyfweliad gyda’r actor a’r tiwtor, Rhys ap Trefor

Ar 3 Rhagfyr am 6yh, bydd Rhys ap Trefor yn pobi cacen sinsir Nadoligaidd yn ystod sesiwn goginio ar Zoom. Dyma gyfle i chi ddod i’w adnabod ychydig yn well.

Os dych chi eisiau ymuno yn y sesiwn, cofrestrwch yma.  

O ble wyt ti’n dod a beth yw dy gefndir di?

Dw i’n dod o Garndolbenmaen yn wreiddiol, pentre bach yng Ngwynedd.  Dw i’n byw yng Nghaerdydd nawr gyda fy mhartner a fy mab.

Beth yw dy swydd o ddydd i ddydd?

Actor dw i.  Dw i’n gweithio ar raglenni teledu, cynyrchiadau theatr, dramâu radio, lleisio cartwnau a gemau fideo.  Pob math o bethau.  Dw i hefyd yn cyfarwyddo ac yn ysgrifennu.

Pryd ddechreuodd dy ddiddordeb mewn coginio?

Dw i’n hoffi gwneud cacennau ers o’n i’n blentyn.

Oes rhywun/rhywbeth yn dy ysbrydoli di i goginio?

Roedd rhaid i fy mhartner stopio bwyta glwten am resymau iechyd.  Doedd dim llawer o ddewis o gacennau a bwydydd iddi hi fwyta.  Felly, gwnes i ddechrau coginio gyda chynhwysion di-glwten.

Beth yw dy hoff gacen a pham?

Cwestiwn anodd!  Cacen goffi a chnau Ffrengig (walnuts) dw i’n meddwl.  Mae’n fy hatgoffa i o fy Nain (Mam-gu).

Beth wyt ti’n mwynhau gwneud yn dy amser hamdden?

Dw i’n mwynhau seiclo o amgylch ardal Caerdydd.  Dw i hefyd yn rhan o dîm Pétanque Cwins Caerdydd.

Oes gen ti unrhyw gyngor i ddysgwyr y Gymraeg?

Ymarfer a pheidio bod ofn gwneud camgymeriadau.  Dyw fy Nghymraeg i ddim yn berffaith (o bell ffordd) - ei defnyddio sy’n bwysig.

Beth yw dy hoff air Cymraeg?

Lletwad (Ladle)

Disgrifia dy hun mewn tri gair.

Sensitif.  Diog.  Gwirion.

*Pétanque – gêm Ffrengig sy’n cael ei chwarae yn yr awyr agored yw Pétanque. Mae dau dîm yn chwarae yn erbyn ei gilydd a bwriad y gêm yw ceisio taflu peli mor agos â phosib at y bêl darged.