Holi David

Mae David Robinson yn artist ac mae wedi dysgu Cymraeg. 

Cafodd ei eni yn Lloegr, ond mae’n byw ym Mhorthcawl ac mae’n defnyddio’r Gymraeg yn y gymuned bob dydd.

Bydd David yn arddangos darn o gelf yn Y Lle Celf ar faes yr Eisteddfod yn Rhondda Cynon Taf fis Awst.

Dyma ychydig o’i hanes.

O ble dych chi’n dod?

Ces i fy ngeni yng Nghaer, a fy magu yn Swydd Gaerhirfryn.  Dw i wedi byw mewn nifer o lefydd dros y blynyddoedd, ond gwnes i symud i Borthcawl yn 2021.

Ers pryd dych chi’n dysgu Cymraeg?

Gwnes i ddechrau dysgu Cymraeg tua 10 mlynedd yn ôl, pan o’n i’n byw yn Rhydychen.  Roedd cwrs awr yr wythnos yn y brifysgol.  Ar ôl i fi symud i Swindon, gwnes i barhau gyda SaySomethinginWelsh.  Wedyn, gwnes i ddechrau cwrs Sylfaen ar-lein gyda Dysgu Cymraeg Caerdydd ar ôl symud i Borthcawl.

Pam dechrau dysgu Cymraeg?

Pan wnes i gwrdd â fy ngŵr Mark, roedd e’n byw yng Nghaerdydd.  Wrth ymweld â fe, a theithio o gwmpas Cymru gyda’n gilydd, ro’n i eisiau dysgu mwy am Gymru a’r iaith Gymraeg.    

Ydy’r Gymraeg wedi helpu eich gyrfa fel artist?

Ydy, mae cwsmeriaid, dilynwyr a chyd-artistiaid yn siarad Cymraeg â fi.  Dyna pam mae fy ngwaith yn ddwyieithog; fideos YouTube, bwletinau e-bost, cardiau, teitlau paentiadau neu anfonebau. 

Beth dych chi’n ei wneud yn yr Eisteddfod eleni?

Ar ddydd Sadwrn, bydda i yn y Lle Celf achos bydd darn o waith gen i yn yr arddangosfa.  Ddydd Sul, bydd trip capel i’r gwasanaeth ar y maes.  Yna ar ddydd Mercher, bydda i’n mynd i ddigwyddiad ym Maes D, felly dw i’n edrych ymlaen at yr wythnos. 

Dych chi’n hoffi dysgu ieithoedd?

Ydw.  Mae dysgu ieithoedd wedi cyfoethogi fy mywyd.  Gwnes i ddysgu Ffrangeg a Sbaeneg yn y brifysgol, ac roedd astudio dramor yn fraint.

Dych chi’n hoffi darllen llyfrau Cymraeg?

Ydw, dw i’n hoffi llyfrau ffeithiol.  Dw i wedi prynu tri llyfr newydd yn ddiweddar - ‘Hanes yn y tir’ gan Elin Jones, ‘Cymru’r Cynfas’ gan Hywel Harries ac ‘Arlunwyr mawr y byd’ gan Myfi Williams.  Digon i fy nghadw’n brysur!

Beth dych chi’n ei gyfrannu i’r papur bro lleol?

‘Yr Hogwr’ ydy ein Papur Bro yn ardal Pen-y-bont ar Ogwr.  Dros y blynyddoedd, dw i wedi cyfrannu ryseitiau syml, newyddion am fy ngwaith celf a digwyddiadau cymunedol.

Sut mae’r Gymraeg wedi agor drysau i chi?

Dw i wedi dod i adnabod pobl arbennig; yn fy nosbarth Cymraeg, yn y capel, mewn digwyddiadau lleol ac ar-lein, heb anghofio cael cymryd rhan yn yr Eisteddfod.

Unrhyw gyngor i eraill sy eisiau dechrau dysgu Cymraeg?

Ymunwch â chwrs a chwiliwch am weithgareddau sydd o ddiddordeb er mwyn ymarfer eich Cymraeg.  Er enghraifft boreau coffi, corau, capeli, teithiau cerdded - mae cyfleoedd ym mhob ardal, ewch i chwilio amdanyn nhw!