Holi Haley

Yma, ’dyn ni’n holi Haley Evans, sy’n dod o Gaerffili ac sy’n dysgu Cymraeg ar Duolingo.  Mae hi’n cefnogi tîm pêl-droed Cymru ac wedi dechrau busnes yn gwerthu dillad pêl-droed i ferched.

Ble wyt ti’n dysgu Cymraeg?

Ar hyn o bryd, dw i’n dysgu ar y daith i fy ngwaith pob dydd yng Nghasnewydd – dw i’n dal y trên o Gaerdydd ac yn agor Duolingo.  Fel arfer, dw i’n gwneud cwpwl o sesiynau bob bore.  Dw i’n lwcus achos mae’r cwmni cyfreithiol dw i’n gweithio iddo yn annog pobl i ddysgu Cymraeg, ac mae nifer o siaradwyr Cymraeg yn y gwaith sy’n hapus i fy helpu.

Beth ydy’r peth gorau am ddysgu Cymraeg?

Dylen ni fod yn falch o’r iaith Gymraeg.  Dw i’n deall mwy a mwy o Gymraeg drwy’r amser ac mae hynny’n gwneud i mi deimlo’n hapus iawn.

Wyt ti’n defnyddio dy Gymraeg y tu allan i’r dosbarth?

Mae nwyddau Cymraeg o gwmpas y tŷ – mat ‘croeso’ wrth y drws, clustog ‘hapus’ a magned ar yr oergell sy’n dweud ‘dw i’n hoffi pêl-droed.’  Dw i bob amser yn dweud diolch ar waelod neges ac yn trio anfon neges Gymraeg at gydweithwyr a ffrindiau sy’n siarad Cymraeg.

Wyt ti’n defnyddio’r Gymraeg yn y busnes?

Ydw – mae sawl un o’r crysau t yn Gymraeg, gan gynnwys crysau Cwpan y Byd wrth gwrs.  Dw i bob amser yn defnyddio Cymru yn hytrach na Wales ac mae gan fy ngwefan gyfeiriad Cymraeg sef feWales.cymru.

O ble wyt ti’n cael dy syniadau i gynllunio’r dillad?

Dw i wastad wedi bod yn reit greadigol felly dw i’n meddwl am syniadau yn gyflym, ond mater arall yw eu rhoi ar waith.  Mae’n hawdd cael ysbrydoliaeth wrth wylio timau pêl-droed dynion a merched Cymru.

Pryd wnest ti ddechrau dangos diddordeb yn nhîm pêl-droed Cymru?

Roedd pêl-droed yn rhan fawr o fy magwraeth.  Es i i fy ngêm gartref gyntaf yn 1999, ac mi wnes i fynd i weld Cymru oddi cartref am y tro cyntaf yn 2003.  Dw i prin yn colli gêm.

Pam wnest ti sefydlu’r busnes?

Achos nad oedd unrhyw beth ar gael i ferched.  Roedd dillad i ferched yn arfer bodoli flynyddoedd yn ôl, ond mi wnaeth rheiny ddiflannu.  Mi wnes i benderfynu mynd ati wedyn i greu rhai fy hun.

Oeddet ti’n disgwyl i’r busnes fod mor llwyddiannus?

Na.  Ro’n i’n gobeithio basai’r busnes yn llenwi bwlch a bod rhai pobl yn mynd i hoffi’r cynnyrch, ond mae wedi bod mor boblogaidd dros y blynyddoedd a dw i wedi gwneud ffrindiau arbennig.

Beth ydy’r cam nesaf gyda dysgu Cymraeg?

Cario ymlaen a magu mwy o hyder.  Mae gen i ffrindiau sy wedi dysgu Cymraeg ac maen nhw’n siarad Cymraeg yn hyderus, felly dw i eisiau gallu gwneud yr un peth rhyw ddydd.

Unrhyw gyngor i ddysgwyr sydd eisiau dysgu Cymraeg?

Ewch amdani, hyd yn oed os dych chi’n dysgu ychydig ar y tro, mi wneith hynny wneud gwahaniaeth.  Peidiwch â bod ofn gwneud camgymeriadau achos mae’r rheiny sy’n siarad Cymraeg wedi bod mor gefnogol ac yn hapus i helpu.