Holi Sara

Yma, ’dyn ni’n holi Sara Maynard, enillydd Gwobr Goffa Basil Davies, a roddir i’r person sy’n cael y marc uchaf yn arholiadau dysgu Cymraeg CBAC bob blwyddyn.  Mae Sara yn defnyddio ei Chymraeg yn y gwaith bob dydd gyda Phrifysgol De Cymru.

Sut dych chi’n defnyddio eich Cymraeg yn eich gwaith?

Ers 2017, fi ydy Swyddog Iaith Gymraeg Prifysgol De Cymru a hyd at ddiwedd y flwyddyn, dw i’n Bennaeth y Gymraeg.  Fel Swyddog Iaith, dw i’n rheoli’r tîm cyfieithu ac fel Pennaeth y Gymraeg, dw i’n gweithio gyda staff academaidd y brifysgol i ddatblygu ein darpariaeth cyfrwng Cymraeg.

Oedd gweithio trwy gyfrwng y Gymraeg yn bwysig i chi?

Mae’r Gymraeg wastad wedi bod yn bwysig i fi a dw i’n falch fy mod i’n Gymraes.  Pan ddaeth y cyfle i weithio trwy gyfrwng y Gymraeg, es i amdani.  Roedd y swydd hefyd yn rhan amser ac yn siwtio fy amgylchiadau personol gyda’r plant mor ifanc.

Oes rhywun arall yn siarad Cymraeg yn y teulu?

Mae fy mhlant yn siarad Cymraeg ac mae fy ngŵr wedi dysgu Cymraeg.  Mae e’n dal i fynychu dosbarth dysgu Cymraeg rhithiol bob wythnos.  Cymraeg ydy iaith yr aelwyd yn bennaf.

Dych chi wedi ennill Gwobr Goffa Basil Davies – sut dych chi’n teimlo?

Mae’n fraint i ennill y wobr.  Roedd Basil Davies yn teimlo’n angerddol iawn dros y Gymraeg ac yn estyn croeso i bwy bynnag oedd eisiau dysgu’r iaith. 

Oes gyda chi unrhyw gyngor i ddysgwyr y Gymraeg?

Ewch amdani!  Peidiwch â phoeni am wneud camgymeriadau - dyna sut mae pawb yn dysgu.   Mae’r dosbarthiadau yn hwyl, dw i wedi gwneud cymaint o ffrindiau a ’dyn ni’n cymdeithasu tu fas i’r dosbarth.

Basil Davies

Tiwtor Cymraeg ym Mhrifysgol Morgannwg (Prifysgol De Cymru erbyn hyn) oedd Basil Davies. Dysgodd e’r Gymraeg i gannoedd o bobl yn y cymoedd ar gyrsiau dwys y Brifysgol. Gwnaeth e hefyd addasu llawer o lyfrau i ddysgwyr, roedd e’n diwtor ar y rhaglen radio boblogaidd ‘Catchphrase’ ar Radio Wales, a Basil oedd Cadeirydd y Pwyllgor arholiadau Dysgu Cymraeg. Basai’n hapus iawn bod rhywun o’i brifysgol e wedi ennill y wobr.