Mae’r dudalen hon yn rhoi blas i chi o waith/gyfrifoldebau tiwtor yn y sector Dysgu Cymraeg - a sut mae mynd ati i wneud cais am swydd tiwtor.
Mae gan y Ganolfan Dysgu Cymraeg Genedlaethol ddeg o ddarparwyr ar draws Cymru ac i’r darparwyr hynny mae tiwtoriaid yn gweithio, nid i’r Ganolfan.
Mae’r Ganolfan yn creu adnoddau ar gyfer y cyrsiau:
llyfrau cwrs
pecynnau adnoddau
clipiau sain a fideo
cyflwyniadau pwynt pŵer
llu o adnoddau digidol
Mae tua 17,000 o bobl yn dysgu Cymraeg gyda’r Ganolfan bob blwyddyn. Mae dosbarthiadau yn cael eu cynnig ar bum lefel wahanol: o Fynediad i ddechreuwyr hyd at gyrsiau Gloywi ar gyfer dysgwyr rhugl.
Mae’r dosbarthiadau hyn yn cael eu cynnal yn y gymuned ac ar-lein, yn ystod y dydd a gyda’r nos. Mae CBAC yn cynnig arholiad ar ddiwedd pob un o’r lefelau, ond mae’r arholiadau hyn yn opsiynol.
Dilynwch y botwm canlynol i ddysgu mwy am y Lefelau Dysgu Cymraeg:
Mae darparwyr lleol a’r Ganolfan yn cynnig hyfforddiant i diwtoriaid yn flynyddol.
Cynhelir sesiynau Datblygu Proffesiynol Parhaus gyda phob tiwtor yn unigol. Mae’n bosib iawn y bydd y darparwr lleol eisiau i chi gwblhau cymhwyster Dechrau Dysgu.
Mae’r cymhwyster hwn ar ffurf dau benwythnos preswyl, a sesiynau rhithiol yn fwy cyson. Mae ymarfer dysgu yn rhan bwysig iawn o’r cymhwyster hwn.
Un o brif nodau’r Ganolfan yw creu siaradwyr Cymraeg hyderus sy’n defnyddio eu Cymraeg. Mae’n bwysig ein bod yn annog ein dysgwyr i ymarfer eu Cymraeg y tu allan i’r dosbarth e.e. sesiynau sgwrs, boreau coffi, clybiau darllen, Gŵyl Ddarllen Amdani, teithiau cerdded ac ati, a thrwy fynychu digwyddiadau yn eu cymunedau lleol.
Mae cynllun o’r enw Defnyddio fy Nghymraeg yn annog dysgwyr i osod nodau realistig a chyraeddadwy. Un o’n cynlluniau ar gyfer Cefnogi Dysgwyr yw cynllun Siarad, lle 'dyn ni’n paru siaradwyr rhugl a dysgwyr i gyfarfod am ddeg awr. Beth am wirfoddoli?
Dilynwch y botymau canlynol i ddysgu mwy am Defnyddio Fy Nghymraeg a'r cynllun Siarad.
Mae’r Ganolfan yn awyddus i greu cronfa o enwau unigolion sydd â diddordeb i weithio fel tiwtor. Byddwn yn rhannu eich manylion gyda’r darparwyr a byddan nhw’n cysylltu’n uniongyrchol â chi i drafod unrhyw gyfleoedd gwaith.
Os dych chi eisiau hybu’r Gymraeg a chefnogi siaradwyr newydd, fel aelod o sector gyfeillgar a phroffesiynol, llenwch y ffurflen isod: