Mae athrawes Saesneg, sydd wedi dysgu mewn nifer o wledydd dros y blynyddoedd, bellach yn dysgu Cymraeg o’i chartref yn Kuwait.
Mi wnaeth Ann Turner symud i Kuwait yn ddiweddar ar ôl cael ei phenodi i swydd dysgu Saesneg i bobl sy’n siarad ieithoedd eraill, mewn Prifysgol Americanaidd. Cyn symud i Kuwait, bu’n gweithio am gyfnod yn Saudia Arabia, Yr Almaen, a chyn hynny bu’n dysgu myfyrwyr ym Mhrifysgolion Caerdydd ac Essex.
Cafodd Ann ei magu yng ngogledd Essex, ac mi ddatblygodd ei diddordeb yn y Gymraeg ar ôl iddi gyfarfod Simon, ei gŵr. Treuliodd Simon, a ddaw yn wreiddiol o Swydd Gaerloyw, gyfnodau helaeth yng ngogledd Cymru pan yn blentyn. Ddeng mlynedd ar hugain yn ôl, treuliodd Ann a Simon eu gwyliau cyntaf fel pâr priod ym Meddgelert, Gwynedd. Cawsant fodd i fyw yn cerdded y mynyddoedd fel yr eglura Ann;
‘‘Mae fy ngŵr yn caru Cymru a rygbi ac mi wnaeth hynny sbarduno fy niddordeb yn y Gymraeg! ’Dyn ni wedi mwynhau gwyliau lu gyda’n gilydd yng ngogledd Cymru, a dw i bob amser yn rhyfeddu at yr arwyddion ffyrdd, a’r ffaith fod Cymru mor hardd, a’r iaith Gymraeg mor wahanol a hynafol.’’
Mae Ann eisoes yn siarad Ffrangeg, Eidaleg ac ychydig o Arabeg ac mae hi’n mwynhau’r broses o ddysgu Cymraeg ar Zoom. Mae hi’n astudio cwrs lefel Mynediad ar gyfer dechreuwyr gyda Dysgu Cymraeg Ardal Bae Abertawe, sy’n cael ei gynnal gan Brifysgol Abertawe ar ran y Ganolfan Dysgu Cymraeg Genedlaethol. Mae Ann yn ymuno â’r dosbarth rhwng 9yh-12yb amser Kuwait. Meddai tiwtor Ann, Catherine Davies-Woodrow;
‘‘Mae Ann yn gwneud yn arbennig o dda yn y sesiynau, yn enwedig o ystyried ei bod yn astudio mor hwyr yn y nos! Mae’n amlwg bod ganddi ddiddordeb mawr mewn ieithoedd a dw i’n gobeithio y gwnaiff hi barhau i ddysgu. Mae stori Ann yn profi fod dysgu Cymraeg dros Zoom wedi creu cymuned fyd eang, a bod modd i unrhyw un ymuno o bedwar ban byd.’’
Mae Ann yn gobeithio symud i Gymru rhyw ddydd a pharhau i ddysgu Cymraeg. Mae Simon, ei gŵr, wedi llogi tŷ yn Ystradgynlais ac mae’n edrych ymlaen at dreulio amser yno yn ystod y gwyliau;
‘‘Dw i’n bwriadu aros yn Kuwait am flwyddyn neu ddwy, ond pan fyddaf yn dychwelyd i’r Deyrnas Unedig yn ystod y gwyliau, dw i’n gobeithio gweld y tŷ mae fy ngŵr wedi’i logi er mwyn cerdded y mynyddoedd. Dw i am barhau i ddysgu Cymraeg – a dw i’n teimlo’n hynod ffodus fod modd i mi ddysgu Cymraeg a finnau mor bell o Gymru.’’
