Cefnogi dysgwyr trwy ‘siarad’ gyda’n gilydd
Bydd cyfle i ddysgwyr Cymraeg ym mhob cwr o Gymru ymarfer yr iaith a magu hyder newydd wrth i gynllun o’r enw ‘Siarad’ gael ei gyflwyno’n genedlaethol gan y Ganolfan Dysgu Cymraeg Genedlaethol.
Nod y cynllun gwirfoddol, sy’n paru siaradwyr Cymraeg gyda dysgwyr, yw codi hyder dysgwyr trwy roi cyfle iddynt sgwrsio yn anffurfiol gyda siaradwyr rhugl.
Peilotwyd y cynllun mewn pedair ardal yn gynharach eleni, ac yn dilyn yr ymateb brwd a gafodd, bydd yn cael ei gyflwyno’n genedlaethol o fis Medi ymlaen.
Bydd parau yn ymrwymo i gwrdd am o leiaf 10 awr i sgwrsio ac ymarfer. Bydd y dysgwyr hefyd yn cael eu cyflwyno i gyfleoedd i ddefnyddio’r Gymraeg yn eu hardaloedd.
Mae’r cynllun ar gyfer dysgwyr sy’n dysgu ar lefel Canolradd + y sector Dysgu Cymraeg. Bydd yn cael ei weinyddu gan 10 o ddarparwyr y Ganolfan; mae pedwar Coleg Addysg Bellach yng Nghymru hefyd wedi ymrwymo i’r cynllun.
Meddai Eluned Morgan AC, Gweinidog y Gymraeg a Dysgu Gydol Oes:
“Mae gyda ni gyd gyfraniad i’w wneud i’r nod o filiwn o siaradwyr Cymraeg erbyn 2050, ac mae’r cynllun ‘Siarad’ yn ffordd wych o gefnogi dysgwyr ac agor y drws i brofiadau drwy gyfrwng y Gymraeg.
“Mae’n galonogol tu hwnt i glywed bod y cynllun eisoes wedi cynnig cyfle i gynifer o ddysgwyr a siaradwyr ddefnyddio a mwynhau’r iaith gyda’i gilydd mewn cyd-destun anffurfiol a chwbl naturiol.
“Rwy’n falch iawn bod modd i’r Ganolfan Dysgu Cymraeg Genedlaethol ehangu’r cynllun o fis Medi er mwyn i ddysgwyr ar draws Cymru elwa o’r gefnogaeth.”
Meddai Helen Prosser, Cyfarwyddwr Strategol y Ganolfan Dysgu Cymraeg Genedlaethol:
“Mae’r ymateb i’r cynllun peilot wedi bod yn wych.
“Mae dysgwyr yn dweud eu bod nhw wedi dod i’r arfer o ddefnyddio’r Gymraeg wrth gymryd rhan yn y cynllun, a magu hyder i ddefnyddio’r iaith y tu allan i’r dosbarth. Mae siaradwyr Cymraeg hefyd wedi gwerthfawrogi’r cyfle i gefnogi unigolion sy’n dysgu – mae pawb wedi elwa.
“Mae creu cyfleoedd newydd a phrofiadau positif i ddysgwyr fwynhau’r Gymraeg yn rhan hollbwysig o waith y Ganolfan, ac edrychwn ymlaen at gyflwyno’r cynllun hwn ledled Cymru.”
I gymryd rhan yn y cynllun – fel siaradwr neu ddysgwr Canolradd + - ebostiwch swyddfa@dysgucymraeg.cymru neu ewch i'r dudalen yma.
Diwedd
