Ystadegau Dysgu Cymraeg

Mae data'r rhaglen Dysgu Cymraeg yn cael eu rheoli gan y Ganolfan Dysgu Cymraeg Genedlaethol.

Mae cronfa ddata ganolog yn casglu gwybodaeth gan bob dysgwr wrth iddynt gofrestru i fynychu cwrs. Mae’r wybodaeth hon yn cynnwys manylion am y dysgwr (e.e. enw, cyfeiriad, dyddiad geni) a’r cwrs (lefel, lleoliad, dwyster y dysgu).

Dechreuodd y Ganolfan gyhoeddi data ar gyfer y flwyddyn academaidd 2017-2018.

Mae'r data a gyhoeddir yn cynnwys gwybodaeth am holl waith y Ganolfan Dysgu Cymraeg Genedlaethol.  Mae hyn yn cynnwys y gwaith Dysgu Cymraeg wyneb yn wyneb a rhithiol yn y gymuned, cynllun Cymraeg Gwaith sy'n darparu cyfleoedd Dysgu Cymraeg i weithluoedd, cynllun Cymraeg yn y Cartref sy'n darparu cyfleoedd Dysgu Cymraeg i deuluoedd, Cynllun Ymlaen gyda'r Dysgu Pobl Ifanc sy'n darparu cyfleoedd Dysgu Cymraeg i bobl ifanc 16-25 oed a Cynllun y Gweithlu Addysg, sy'n darparu cyfleoedd Dysgu Cymraeg i weithlu'r Sector Addysg.  Mae data 2023-24 hefyd yn cynnwys darpariaeth o fath wahanol i'r Ganolfan, sef darparu cyfleoedd codi hyder i siaradwyr Cymraeg di-hyder.  

Mae’r data hefyd yn cynnwys ystod o ddulliau dysgu, gan gynnwys dysgu wyneb yn wyneb, dysgu rhithiol, dysgu cyfunol a hunan-astudio.

Mae'r Ganolfan Dysgu Cymraeg Genedlaethol yn gyhoeddwyr ystadegau swyddogol. Wrth gyhoeddi ein data, byddwn yn cydymffurfio â Chod Ymarfer Awdurdod Ystadegau'r DU (UKSA).

Beth yw'r Cod Ymarfer ar gyfer Ystadegau?

Mae'r cod yn cyflwyno fframwaith er mwyn sicrhau bod ystadegau yn ddibynadwy, o ansawdd ac yn werthfawr.

Mae'r cod wedi ei seilio ar yr egwyddorion hyn gan osod y gweithdrefnau angenrheidiol er mwyn eu sicrhau.

Trwy gydymffurfio â'r cod, gall defnyddwyr yr ystadegau ymddiried yn y wybodaeth a gynhyrchir gan y Ganolfan Dysgu Cymraeg Genedlaethol.

EGWYDDORION

DIBYNADWYEDD - Ymddiriedaeth yn y sefydliadau a'r rhai sy'n cynhyrchu ystadegau a data

• Gonestrwydd a dilysrwydd
• Penderfyniadau annibynnol ac arweiniad
• Rhyddhau’n drefnus
• Prosesau a rheolaeth sy’n dryloyw
• Gallu proffesiynol
• Llywodraethu data

ANSAWDD - Data a dulliau sy'n sicrhau ystadegau o ansawdd

• Ffynonellau data addas
• Dulliau cadarn
• Sicrhau ansawdd

GWERTH - Ystadegau sy'n bodloni angen cymdeithas am wybodaeth

• Perthnasedd i ddefnyddwyr
• Hygyrchedd
• Eglurdeb a chrebwyll clir
• Arloesi a gwella
• Effeithlonrwydd a chymesuredd

Beth fyddwn ni'n ei wneud os bydd y cod wedi ei dorri?

• Byddwn yn hysbysu'r Ystadegydd Cenedlaethol os oes cwynion am safon ein cyhoeddiadau ystadegol.
• Byddwn yn adrodd wrth yr Ystadegydd Cenedlaethol os bydd data yn cael ei ryddhau yn ddamweiniol neu mewn modd anghywir.
• Bydd y Ganolfan Dysgu Cymraeg yn ymchwilio i amgylchiadau os bydd yn arwain at dorri'r cod ac yn rhoi gwybod i Awdurdod Ystadegau'r DU (UKSA).
• Os oes gennych unrhyw gwestiynau neu sylwadau am yr ystadegau, yna cysylltwch â Swyddfa@dysgucymraeg.cymru.