Holi Mari Emlyn

Yma, ’dyn ni’n holi’r actores, sgriptwraig a’r awdures, Mari Emlyn sy’n byw yn Y Felinheli gyda’i theulu.  Mae Mari wedi ysgrifennu sawl nofel ac mae hi hefyd yn diwtor Dysgu Cymraeg gyda Dysgu Cymraeg Gogledd Orllewin.

Mae’r cyfweliad yma wedi’i gyhoeddi fel rhan o Amdani - Gŵyl Ddarllen Dysgu Cymraeg.  Mae mwy o wybodaeth am yr ŵyl ar gael yma.

Hoff lyfr yn blentyn?

Un Noson Dywyll gan T. Llew Jones.

Hoff lyfr fel oedolyn?

Un o fy hoff lyfrau ydy The Death of David Debrizzi gan Paul Micou.  Dw i’n mynd yn ôl at y llyfr yma’n aml yn meddwl pa mor braf fasai gallu ysgrifennu gystal â Paul Micou.  Wna i byth flino ar y nofel yma.

Pa lyfr sy wedi dylanwadu fwyaf arnoch chi?

Llyfr Sali Mali gan mai dyma’r llyfr a agorodd y drws i mi ar fedru darllen!

Ble dych chi’n ysgrifennu?

Yn rhywle, weithiau ar drên, ar fy ngwyliau, mewn caffi, ond fel arfer yn fy stydi.

Pa bynciau sy’n eich ysbrydoli i ysgrifennu?

Pynciau sy’n agos at fy nghalon: pynciau fel ysgrifennu – mae llawer o fy ngwaith am lyfrau neu am bobl yn trio creu (Mefus yn Y Glaw/ Wal / Llyfr y Flwyddyn); yr amgylchedd (Wal); merched (Wal / Llyfr y Flwyddyn).

Pa lyfr fasech chi yn ei brynu yn anrheg i rywun?

Dibynnu pwy sy’n derbyn y llyfr, ond llyfrau dw i’n prynu’n anrhegion i bawb fel arfer.  Dw i newydd brynu llyfr 10 stori o Hanes Cymru y Dylai Pawb eu Gwybod i fy nith fach sydd newydd gael ei geni!

Unrhyw gyngor i rywun sy eisiau dechrau ysgrifennu?

Darllen, darllen, darllen.

Pam penderfynu gweithio fel tiwtor Dysgu Cymraeg hefyd?

Dan ni angen dysgwyr Cymraeg.  Dw i’n mwynhau dysgu dysgwyr a dw i’n dysgu llawer am yr iaith wrth wneud.

Dych chi eisiau ysgrifennu llyfrau i ddysgwyr rhyw ddydd?

Dw i’n credu y byddai fy nofel, Wal yn addas i ddysgwyr gan fod yr iaith yn ailadroddus (repetitive) - er nad ydi hi wedi ei hysgrifennu’n benodol (specific) i ddysgwyr.  Mi faswn i’n hapus iawn i drio ysgrifennu llyfrau i ddysgwyr.